游學修、許賢與蘇致豪創辦的YouTube頻道「試當真」，將於本月26日成立5周年停運，告別重頭戲《墨魚遊戲2》今晚（16日）10時播出。游學修、許賢與蘇致豪今年4月曾公開交代結束「試當真」的原因，表示主因為身心健康，加上成員步入新階段，環境亦有所改變，因此決定好頭好尾，在營運的第5年結業。
游學修近日與《小薯茄》高Ling、《FHProduction 》熊仔頭，接受「毛記電視」節目《國家級高峰會》訪問。他在節目中坦白營運「試當真」5年來所面對的創作、管理與人事之間的問題，難以建立有效規矩，認為公司在這樣的文化下難以持續，因此選擇結束以求解脫。
距離「試當真」結束尚餘10日，游學修在節目中表示雖有不捨，但絕無後悔。他說︰「真實感受係我有一半不捨，有一半就係期待緊我即將會解脫啦﹗有好多問題，我解決唔到，或者唔想解決，咁完咗佢啦﹗」對於不少網民認為「試當真」近月的影片比之前好看，亦覺得眾成員「輕鬆咗好似有番火」，游學修笑言︰「因為死啦嘛﹗『人知將死，其言也善』咁樣﹗譬如搵咗大家幫手嘅短片比賽，短片比賽係其中一樣我好享受嘅一件事。有客戶嘅支持之下又安全地做緊呢件事，無論反應係好與壞都係好。我哋大家一齊做緊一件我認為絕對係有意義嘅事，好正，我好享受。呢段時間，就算我啲同事又好，我自己又好，總會仲有啲不滿或者唔開心，但係會覺得唔緊要啦，完啦，我哋享受埋佢啦。」
游學修直言「試當真」當日開台後只有2、3個月蜜月期，之後就面對網絡常態，甚至成為某些人眼中的「邪惡軸心」。他解釋︰「我覺得可能關以前太招事，好搶口或者好鋒芒畢露，要講好多嘢啊，好WOW，呢個可能都關事。」主持東方昇認為游學修已比從前成熟，「試當真」如繼續營運應該會更好，游學修認同現在的他多了一份「沉穩」，但頻道不止屬於他、許賢與蘇致豪，是有一整個團隊。他續說︰「試當真其實係一Team人，一個頻道或Content Creator同普通一間公司唔同，我覺得係一家人，點都有一個家人嘅成分喺度。呢一家人喺more than同事嘅關係之下，你唔能夠好似重組一間公司，或者有問題就解僱一啲人，或者掉咗啲舊嘢、點樣生一啲新嘢，唔係咁簡單嘅一件事。我嘅感覺係始終已經係一Team人，你要去處理一啲嘢嘅話，自己經驗又好，個文化又好，我覺得解決唔到。」東方昇表示香港一些老舖即使有問題仍會堅持下去，「試當真」卻結束，游學修說︰「係呀﹗我覺得咁樣，呢家人先會成長。」
「小薯茄」的高Ling表示網上頻道很「人」，與經營其他生意不同，老闆要顧及員工感受。他表示「小薯茄」亦在經歷這個階段︰「最差嘅就係啱啱搬咗新Office，嗰期大家溝通好差，唔係鬧交嗰啲，純粹覺得『我唔知你做緊乜嘢」、『原來要做喇』，大家嘅情緒有啲kick。」游學修非常認同︰「我都經歷過，就係『吓，你都唔同我講嘅 』。我唔係唔同你講，係未講或者冇一個講嘅機會，唔係特登唔想畀你知咁樣。」高Ling續說︰「或者有一個project，我想傾得實在啲先會同大家講，方便配合工作，但係喺佢哋嘅角度，就係覺得『吓，你依家先通知我』。」游學修同意︰「係啦﹗『以前唔係咁㗎』、『以前唔係成間公司齊上齊落嘅咩』、『點解依家好似個project去到呢個step，你先突然間同我講要做一件咁嘅事』。如果for觀眾易啲理解，呢個就係我話同一般公司有啲唔同嘅地方。返工從來都係上司講、老細講，你就做囉，事必要同你講㗎？但係YouTube或者做Content Creator，就係有一Team人，好『人』嘅一樣嘢，就係我冇必要同佢講，但係同事會唔開心，可能會覺得點解你唔同我講。」
游學修直言「試當真」成立5年來都是一間冇規矩的公司，他5年來也做不好的就是建立公司規矩。他說︰「定嗰啲規矩通常都唔係好Work，會產生好多不愉快。例如返工，我嘅法定時間係星期一至五，2點至6點，唔返唔使病假紙，或者你有事唔使解釋，你喺個Group度同我講聲，或者遲返講聲得㗎啦。我要先幫佢哋講說話，就係佢哋唔會6點走人，好多時係做到11、12點，甚至乎通宵，呢個就係YouTube嘅生態。2點至6點，我Expect你唔返或者返唔到，至少提早講或嗰日臨時臨急喺個group度講，都會唔講㗎，呢啲就係會令到我就一直有一種... 不過，佢有佢嘅道理，『喂，大佬，我已經做咗兩晚通宵，我今日唔返嗰一個鐘，你就覺得我唔做嘢？』但係，有時規矩就係規矩，所以呢啲位好Tricky。我喺未做過老細嘅情况下，行咗5年之後，然後想有規矩嘅時候，佢唔開心、我唔開心，大家都唔開心，好多呢啲問題。佢哋上心嘅時候係好上心，但係佢唔想跟你嘅嘢嘅時候，佢就唔跟㗎啦，就當我『臭四』㗎啦﹗呢個就係我公司嘅文化囉﹗行咗5年嘅時候，你會發現冇乜可能咁樣行10年、20年，一間公司咁樣係唔Work㗎﹗」
游學修自言作為老闆，既要處理內部問題，又要面對網上言論，曾有段日子非常不好受，再加上自己亦創作頻道內容及演出，覺得再這樣Output下去不是辦法。他表示由第3年開始，身邊不少人也建議他放手，把工作量分給別人。游學修說︰「談何容易？我第3至第5年試過放手，我唔會話100%唔Work，但就去唔番嗰樣嘢。頻道、Content Creator都係跟人，好難一下子放手，然後搵人返嚟，咁就唔係嗰樣嘢㗎啦﹗」談到對頻道影片的要求，東方昇表示只要達到網民的要求就可以，游學修透露︰「我嗰邊多藝術家，就算佢出到嚟，喺網民嗰邊唔達標，佢唔Care，View數唔得、Like數唔得，唔Care。」東方昇驚訝︰「呢個好大問題，即係佢用你嘅平台、你嘅資源去達成自己嘅藝術夢想？咁你會唔會出手？」游學修尷尬表示︰「我哋不如轉個話題啦﹗」他之後表示「試當真」也有一些導演拍出來的片很成功，但「唔叻拍商業嘢」，不想接或拒接商業性工作，他就要在管理上取得平衡。
（即時娛樂）